عەبدولستار ئەمین ماوەى35 ساڵە مار لە ماڵەکەى بەخێو دەکات و لەئێستادا خاوەن 35مار و چەندین باڵندە و پشیلەیە.
لە ماڵی عەبدولستار ئەمین-دا پشیلەیەکى رەنگ سپى خاڵدارى رەش و زەرد پاسەوانى مارەکان دەکات و مارەکانیش پاسەوانى ئەندامانى خێزانەکە و باخچە و باڵندەکانى دیکەى ئەم ماڵە دەکەن.
عەبدولستار ئەمین دوو جۆر مار لە ماڵەکەیدا بەخێو دەکات مارى رەشى بێ ژەهر و شامارى ژەهردار رۆژانە خواردن و خواردنەوەیان بۆ دابین دەکات و لە ساردى و گەرمى دەیانپارێزێت.
عەبدولستار ئەمین لەبارەى بەخێوکردنى مار و گیانەوەرەکانى دیکە بۆ ئاژانسى ئانادۆڵو گوتى: "لەئێستادا 35 مار لە ماڵەکەم بەخێو دەکەم، دانیشتوانى ناحیەى قەسرۆک و دەورووبەرى لە کاتى بینینى مار ئاگادارم دەکەنەوە، منیش دەچم مارەکان دەگرم لە ماڵەوە بەخێویان دەکەن و بەجۆرێک راهێنانیان پێ دەکەم کە کێوى نەمێنن و ماڵى ببن، نەک هەر مار دەتوانم هەموو جۆرە گیانەوەرێک لەگەڵ یەکترى رابهێنم و بەخێویان بکەم بەبێ ئەوەى زیان بەیەکتر بگەیەنن".
گوتیشى: "لە مانگى شەشى هەموو ساڵێک وەرزى زاوزێى مارە لە هەرێمى کوردستان، مارەکانى من بە شێوەیەکى ئاسایی لەم مانگەدا جووت دەبن و دوای ماوەیەک هێڵکە دەکەن و دواتر بێچووە مارەکان دێنە دونیاوە و بەخێویان دەکەم".
ئەو هاووڵاتییە لەبارەى خۆراکى مارەکانەوە دەڵێت "گۆشت، ئاو، شیر و شەکر بە مارەکانم دەدەم. هەفتەى جاریک یان دوو جار گۆشتی مریشک و گۆشتى سووریان پێ دەدەم و لە مانگێکدا دووجار قەفەسیان خاوێن دەکەم".
عەبدولستار ئەمین دەڵێت "جگە لە35 مار، پشیلە و کەو و کۆترم هەیە، ئەگەر ئەو گیانەوارانە لە دەرەوە بن یەکتر دەخۆن، بەڵام لە ماڵەکەى من دۆستى یەکترن. لە ئایندەدا جۆرەها گیانەوەر و باڵندەى دیکە پێکەوە رادەهێنم".
کۆمێنت (0)
تا ئێستا هیچ کۆمێنتێک نەکراوە.