دوای یەکسانبوونی هەردوو یانەی چۆمان و سیروانی نوێ، لە یاری کۆتایی خولی فوتساڵی نایابی کچانی کوردستان و دواخستنی یاری کۆتایی بۆ کاتێکی نادیار، پۆلیسی سلێمانی پێنج هاندەری یانەی چۆمانیان بریندار کرد.
عیسا محەمەد، سەرۆکی یانەی وەرزشی چۆمان بە کوردستان تیڤی ڕاگەیاند: دوای ئەو غەدرە زۆرەی لە یاری کۆتایی لێمانکرا و دوای ئەوەی یەکێتی تۆپی پێی کوردستان بڕیاریدا یاری کۆتایی بۆ کاتێکی نادیار دوابخات.
پۆلیسی چالاکییە مەدەنییەکان لەجیاتی پاراستنی ئەمنیەتی هۆڵەکە و گیانی ئامادەبووان، بەداخەوە لەناوەوەو لەدەرەوەی هۆڵ کەوتنە گیانی هاندەرانمان، بە دەمانچەی کارەبایی پێنج هاندەرمان بریندرا بوون، کە سێ کەسیان ڕەوانەی نەخۆشخانە کران و دووان لەوانە ماوەی دوو کاتژمێر لە ژێر چاودێری پزیشکی مانەوە، یەکێکیش بەهۆی سەختی برینەکەی ئێستاش لە نەخۆشخانەیە.
سەرۆکی یانەی وەرزشی چۆمان، گوتیشی: ئەوکاتەی هێزە ئەمنیەکان پەلاماری هاندەرانی ئێمەیاندا، بەداخەوە (هەڤاڵ ئەبوبەکر) پارێزگاری سلێمانی لەجیاتی هێورکردنەوەی دۆخەکە، هۆڵەکەی بەجێهێشت و پۆلیسەکانیش لە دەرەوەی هۆڵ بازگەیان دانابوو بە دەمانچەی کارەبایی پەلاماری هاندەرانیان داین و ڤیدیۆکانیش بەڵگەی دروستن لەسەر قسەکانمان.
عیسا محەمەد، زیاتر ئاماژە بەوەدەکات ئەوان بە هەر بڕیارێکی یەکێتی تۆپی پێی کوردستان پابەند دەبن کە یاری فیناڵ چۆن و لەکوێ ئەنجام بدرێت، بەڵام جەخت دەکاتەوە کە بەهۆی لایەنگیری ناوبژیوان و دژایەتیکردنیان لەلایەن هێزە ئەمنییەکانەوە، ئەوان یاری فیناڵ لە شاری سلێمانی ئەنجام نادەن، چونکە دەڵێت: لە شاری سلێمانی ئەمنیەتمان پارێزراو نییە.
پ: كهریم سمكۆ
کۆمێنت (0)
تا ئێستا هیچ کۆمێنتێک نەکراوە.