حكومه‌تی یۆنان بڕیاری دا هه‌تا ساڵی 2020 نزیكه‌ی 10 هه‌زار كۆچبه‌ری نایاسایی ڕه‌وانه‌ی توركیا بكاته‌وه، ئه‌مه‌ش پاش ئه‌وه‌ی ڕۆژی یه‌كشه‌ممه ئاگر له نێو كه‌مپـێكی كۆچبه‌ران كه‌وته‌وه و بووه هۆی گیان له‌ده‌ستدانی ژنێك و برینداربوونی 17 كه‌سی دیكه.
ئه‌نجومه‌نی وه‌زیرانی یۆنان دوێنێ دووشه‌ممه كۆبوونه‌وه‌یه‌كی به‌سه‌رۆكایه‌تی به كریاكۆس میتسۆتاكیس سه‌رۆك وه‌زیران ئه‌نجام دا.
پاش كۆبوونه‌وه‌كه ئه‌نجومه‌نه‌كه ڕاگه‌یاندنێكی بڵاوكرده‌وه و تیایدا نووسیویه‌تی حكومه‌تی سه‌رۆك وه‌زیری پـێشوو له ماوه‌ی 4 ساڵ و نیو 1805 كۆچبه‌ری گه‌ڕاندووه‌ته‌وه ، به‌ڵام حكومه‌تی نوێ هه‌تا ساڵی 2020 نزیكه‌ی 10 هه‌زار كۆچبه‌ر ده‌گه‌ڕێنێته‌وه.
رۆژی یه‌كشه‌ممه ئاگرێك كه‌وته‌وه له كه‌مپی مۆریای كۆچبه‌ران له دورگه‌ی لیسبۆس و به‌پـێی شاهیدحاڵه‌كان دوای نزیكه‌ی 20 خوله‌ك كارمه‌ندانی ئاگركوژێنه‌وه گه‌یشتوونه‌ته شوێنه‌كه، بۆیه ئاگره‌كه ته‌شه‌نه‌ی كردووه. كۆچبه‌رانی كه‌مپه‌كه‌ش ناڕه‌زایـیان ده‌ربڕیوه و گرژی لێكه‌وتووه‌ته‌وه.
سه‌رچاوه/ ده‌نگی ئه‌مریكا
کۆمێنت (0)
تا ئێستا هیچ کۆمێنتێک نەکراوە.