ئه‌نگێلا مێركل، راوێژكاری ئه‌ڵمانیا داوا له ئه‌ردۆغان ده‌كات ده‌ستبه‌جێ له‌شكركێشی وڵاته‌كه‌ی بۆ سه‌ر رۆژئاوای كوردستان رابگرێت و ده‌ڵێت، ئه‌و شه‌ڕه دۆخه‌كه ئاڵۆز ده‌كات و ده‌بێته هۆی گه‌ڕانه‌وه‌ی داعش.
وتەبێژی حکومەتی ئەڵمانیا رایگەیاند؛ ئەمڕۆ یەکشەممە ئەنگێلا مێرکڵ، راوێژکاری ئەڵمانیا لە پەیوەندییەکی تەلەفونیدا لەگەڵ رەجەب تەیب ئەردۆغان، سەرۆک کۆماری تورکیا، داوای لێکردووە کە دەستبەجێ هێرشەکانیان بۆسەر رۆژئاوای کوردستان رابگرێت.
ئەوە لەکاتێکدایە بەشێکی زۆر لە وڵاتانی ئەوروپا و جیهان نیگەرانی خۆیان لەو هێرش و پەلامارانە دەربڕیوە و بەشێکی دیکەش لەو وڵاتانە، هاوکاری و ڕەوانەکردنی چەکی نوێیان بە تورکیا راگرتووە.
چوارشەممەى رابردوو سوپاى تورکیا بێ گوێدانە بوونى هاووڵاتیانى مەدەنى ئۆپەراسیۆنی به ناوی (كانی ئاشتی) لە رۆژئاواى کوردستان دەستپێکرد و لەرێگەى فڕۆکەى جەنگى و تۆپخانەوە بۆردومانى شار و شارۆچکە و گوندەکانى کرد، به‌هۆی هێرشه‌كانی توركیا سه‌دان قوربانی لێكه‌وته‌وه، هه‌زارن هاووڵاتیش ئاواره‌بوون.
کۆمێنت (0)
تا ئێستا هیچ کۆمێنتێک نەکراوە.