هادی عامری: سیستمی پەرلەمانی شکستی هێناوە

هادی عامری سەرۆكی هاوپەیمانی فەتح داوای هەمواركردنەوەی دەستوور و گۆڕینی سیستمی حوكمڕانی دەكات و دەڵێت سیستمی پەرلەمانی شكستی هێناوە.
 
هادی عامری سەرۆكی هاوپەیمانی فەتح كە هاوپەیمانییەكەی یەكێكە لە پێكهێنەرە سەرەكییەكانی حكومەت، لە راگەیەندراوێكدا جەختیكردەوە كە چارەسەری راستەقینە بۆ ئەو دۆخەی عێراقی پێدە دەگوزەرێت خۆی لە سەرلەنوێ داڕشتنەوەی پرۆسەی  سیاسیدا دەبینێتەوە.
 
بە پێویستیشزانی كە ئەو گۆڕانكارییە لە ژێر سایەی دەستوور و لە رێی هەمواركردنەوەی ریشەیی دەستووردا دەبینێتەوە و راشیگەیاند" سیستمی پەرلەمانی سەلماندی كە شكستی هێناوە، بۆیە دەبێت سیستمێكی دیكەی حوكمڕانی بۆ عێراق بدۆزرێتەوە.
 
هادی عامری ئەوەشی خستەڕوو كە حكومەتە خۆجێییەكان و پارێزگارەكانیش شكستیان هێناوە و دەبێت هەڵبوەشێنرێنەوە و پارێزگار راستەوخۆ لەلایەن هاووڵاتییانەوە هەڵبژێردرێن.