به‌پێى هه‌واڵێكى ترك بریس، مه‌ولود چاوشئۆغڵو وه‌زیرى ده‌ره‌وه‌ى توركیا رایگه‌یاند: له ئه‌گه‌رى سزادانى ئه‌مریكا بۆ سه‌ر توركیا وڵاته‌كه‌ى وەڵامدانه‌وه‌ى ده‌بێت.
وه‌زیرى ده‌ره‌وه‌ى توركیا له 19ـه‌مینى كۆربه‌ندى ده‌وحه له پایته‌ختى قه‌ته‌ر گوتارێكى پێشكه‌ش كرد و گوتى: "سزادان و زمانى هه‌ڕه‌شه هیچ به‌رهه‌مێكى نییه، پێموایه ئه‌مریكاش ئه‌وه ده‌زانێت، هه‌ر بۆیه دۆناڵد تره‌مپیش نه‌یارى سزادانى ئه‌نقه‌ره‌یه، ئه‌گه‌ر واشنتۆن سزاى توركیا بدات، ئه‌وكات وه‌ڵامى ده‌ده‌ینه‌وه".
چاوشئۆغڵو هه‌روه‌ها گوتیشى: "نامه‌وێ قسه له‌سه‌ر خراپترین سیناریۆ بكه‌م له په‌یوه‌ندییه‌كانى نێوان هه‌ردوو وڵاتدا له كاتى سه‌پاندنى سزاكانى ئه‌مریكا، چونكه توركیا هه‌وڵى پێپه‌ڕاندنى كێشه هه‌ڵپه‌سێردراوه‌كانى نێوان واشنتۆن و ئه‌نقه‌ره ده‌دات و له‌رێگاى گفتوگۆ و دوور له سزادانه‌وه".
چاوشئۆغڵو ئاماژه‌ى به‌وه‌شداو گوتى "ئه‌مریكا هاوپه‌یمانى له‌گه‌ڵ توركیایه، په‌یوه‌ندییه‌كانیشمان له‌گه‌ڵ تره‌مپ تا ئاستێك باشه و هه‌ندێك گرفتمان له په‌یوه‌ندییه‌كانمان له‌گه‌ڵ گۆنگرێس هه‌یه".
جێگاى وه‌بیرهێنانه‌وه‌یه مه‌ولود چاوشئۆغڵو وه‌زیرى ده‌ره‌وه‌ى توركیا پێشتریش به داخستنى هه‌ردوو بنكه‌ى ئه‌نجه‌رلیك و كوره‌جیك هه‌ڕه‌شه‌ى له ئه‌مریكا كرد، چاوشئۆغڵو له هه‌ڕه‌شه‌كه‌یدا گوتبووى ئه‌گه‌ر واشنتۆن سزاى توركیا بدات له‌سه‌ر سیسته‌مى ئێس 400ى رووسى، ئه‌نقه‌ره بێده‌نگ نابێت و له‌وانه‌یه پێداگیرى بكات به‌سه‌ر ئه‌مریكا تا هه‌ردوو بنكه‌ى سه‌ربازى ئه‌نجه‌رلیك و كوره‌جیك به‌جێ بهێڵێت.
ئاماده‌كرن و وه‌رگێڕان/ سیروان عه‌زیز
کۆمێنت (0)
تا ئێستا هیچ کۆمێنتێک نەکراوە.