مەكتەبی سیاسی پارتی دیموكراتی كوردستان پهیامێكی پیرۆزبایی بهبۆنهی سهری ساڵی تازه بڵاوكردهوه و ئهمهش دهقهكهیهتی:
بەبۆنەی ھاتنەوەی سەری ساڵی نوێی زایینی گەرمترین پیرۆزبایی لە کوردستانیانی خۆشەویست لە ناوەوە و دەرەوەی هەرێمی كوردستان دەكەین و، پیرۆزبایی لە كەسوكاری سەربەرزی شەهیدەكان و هێزی پێشمەرگەی كوردستان و سەرجەم کادیر و ئەندامانی دڵسۆزی پارتیمان دەكەین، هیوادارین ساڵی تازە، ساڵی دەستكەوتی زیاتر و بەدیهاتنی سەرجەم مافە رەواكانی گەلەكەمان بێت.
هەلومەرج و بارودۆخی هەستیاری عیراق و ناوچەكە وا دەخوازێ و ئەركی سەرشانی سەرجەم حزب و لایەنە سیاسیەكانە هەوڵی زیاتر بدەین بۆ پتەوكردنی یەكڕیزیی و هەماهەنگی و یەكدەنگیی تا بە هەموو لایەك بتوانین رەوشی ئارام و سەقامگیریی ھەرێم و دەسكەوتەكانمان بپارێزین و هەنگاوی زیاتر بەرەو پێشكەوتن و ئاوەدانكردنەوەی كوردستان بنێین.
جارێكی دیكە و بۆ ساڵی نوێ، جەخت دەكەینەوە سەر زیاتر چەسپاندنی پرەنسیپە راستەقینەكانی هاوپەیمانیەتی و تەبایی نێوان هێز و لایەنە سیاسییەكانی كوردستان و ئاشتەوایی و پێكەوەژیان و گیانی لێبووردەیی لە نێوان گشت پێكهاتە نەتەوەیی و ئایینی و مەزهەبییەكاندا.
ئومێدەوارین ساڵی 2020 ، ساڵێكی پڕ ئاسوودەیی و بەختەوەری و ساڵی گەیشتنمان بێت بە ئاوات و ئامانجە لە مێژینەکانی گەلی کوردستان..
مەكتەبی سیاسی
پارتی دیموكراتی كوردستان
2019/12/31
کۆمێنت (0)
تا ئێستا هیچ کۆمێنتێک نەکراوە.