موقتەدا سەدر داواى به‌په‌له‌ دیاریکردنی که‌سێک بۆ پۆستى سەرۆک وەزیران ده‌کات

موقتەدا سەدر رایدەگەیێنێت، پێویستە پەلە بکرێت لە دیاریکردنی کەسێک بۆ پۆستی سەرۆکایەتیی ئەنجوومەنی وەزیران کە جێگەی مشتومڕ نەبێت و ئاماژە بەوەشدەکات، نابێت حەشدی شەعبی بخزێنرێتە نێو بەرپەرچدانەوەی خۆپیشاندەران.
 
موقتەدا سەدر، رابەری رەوتی سەدر لە تویتێکدا جەخت لەوە دەکاتەوە، پێویستە پەلە بکرێت لەوەی کەسێک دیاریبکرێت کە جێگەی مشتومڕ نەبێت و پێشکەش بە سەرۆککۆمار بکرێت تاوەکو بۆ پێکهێنانی حکومەت رایبسپێرێت؛ هەروەها دەڵێت، سیاسییەکان با بەس بێت کات کووشتن و ململانێ لە پێناو دەستکەوت و پێیان دەڵێت، گەل و عێراقەکەتان لە مەترسیدایە.
 
موقتەدا سەدر ئاماژەی بەوەکردووە، رێز لە بڕیاری خۆپیشاندەران دەگرێت و هیوادارە پابەندبن بە هەنگاوی ئاشتیانەی خۆپیشاندانەکان، زیان بە ئاسایشی گەل نەگەیێنن، وڵات بەرەو جەنگی ناوخۆیی هان نەدەن.
 
هەروەها دەشڵێت، رێز لە بڕیاری حکومەت دەگرێت لە بەرپەرچدانەوەی تێکدەران و کاری ئاژاوەگێڕی، بەڵام پێویست ئاشتیخواز و تێکدەر لێکجیابکرێنەوە، ناشبێت حەشدی شەعبی بخزێنرێتە نێو بەرپەرچدانەوەكان، چونکە ئابڕووی حەشد خراپ دەکات.