کۆمپانیای "Collins Aerospace" بەهەماهەنگی لەگەڵ ئەندازیاران لە زانکۆی نۆتنگهام توانى فڕۆکەیەکی کارەبایی نوێ بەرهەم بێنێ، کە بە له‌ڕادەبەدەر وەسفی کرد، چونكه دەتوانێت 10 تۆن بار هەڵبگرێت و بۆ ماوەی 5 رۆژی به بەردەوامى لە ئاسمان بمێنێته‌وه.
بەگوێرەی پێگەی "Business Insider"، کۆمپانیای دروستکەر رایگه‌یاند، فڕۆکەکە هیچ دەنگێکی ئه‌وتۆ دەرناکات و ئەوپەڕی بار هەڵگرتنی دەگاتە 10 تۆن و، دەتوانێت مەودای 4 هەزار میلی دەریایی کە دەکاتە نزیکەی 7,408 کیلۆمەتر لە ئاسمان به بەرزی 20 هەزار پێ بفڕێت و بمێنێتەوە.
پێگەکە روونیشی کردەوە، دەتوانرێت فڕۆکەی "Airlander 10" بۆ چەند مەبەستێکی جیاواز بەکاربهێنرێت وەک: بەرگری، ئاسایش، پاڵپشتی لۆجستی، گەشت، پاسەوانیی کەناراوه‌کان، پاراستنی ئاوە هەرێمییەکان و گواستنەوەی بریکارانی کەرتی تایبەت، هه‌روه‌ها دەکرێت ئەم هەموو بەکارهێنانە لەڕێگەی گۆڕینی دیزاینى ناوه‌وه‌‌ى فڕۆکەکە بەدی بهێنرێ.
پێگەکە جەختی کردەوە، فڕۆکەکە به پێچەوانەی فڕۆکەکانى تر و بەلەم و فڕۆکەى هیلیکۆپتەر، پێویستی بە شوێن و رێڕەوی تایبەت نییە بۆ نیشتنەوە و دەتوانێت لەسەر زەوی و سەهۆڵبەندان و ژینگەی بیابانیش بفڕێت و بنیشێتەوە، چونکە پێویستی بە ژێرخانی تایبه‌ت نییە بۆ فڕین یان نیشتنەوە، ئەمەش وادەکات کارپێکردنی هەرزانتر بێت.
کۆمێنت (0)
تا ئێستا هیچ کۆمێنتێک نەکراوە.