بەڕێوەبەرایەتیی ئاوەڕۆكانی هەولێر داوا لە هاووڵاتییانی شاری هەولێر دەكات، هاوكاریان بن لە فڕێ نەدانی پاشماوەی قورس، وەك خۆڵ و خاشاك و كەلوپەل و تایەی ئۆتۆمبێل، بۆ ناو كونی ئاوەڕۆكان، چونكە دەبنە هۆی بەربەست لەبەردەم رێڕەوی ئاو و گیرانی ئاوەڕۆكان، لە ئەنجامدا ئاوی زیادە لەسەر شەقام و سەر شۆستە و ناو گەڕەكەكان كۆدەبێتەوە.
هەروەها بەڕێوەبەرایەتیی ئاوەڕۆكانی هەولێر رەخنەش لە هاووڵاتییان دەگرێت كە لەكاتی هەڵمەتی پاككردنەوەی ئاوەڕۆكان، دەركەوتووە كەلوپەل و تایە و خۆڵ و خاشاكی قورس فڕێدراونەتە ناو ئاوەڕۆكانەوە و ئەمەش ئاستەنگی بۆ رێڕەوی ئاو و تەنانەت تیمەكانی پاككردنەوەش دروستكردووە بەوەی بە زەحمەت دەتوانن كونی ئاوەڕۆكان پاك بكەنەوە، بۆیە داوا لە هاووڵاتییانی شاری هەولێر دەكات بەڕەچاوكردنی پاراستنی ژینگە و پاكڕاگرتن و بۆ سەلامەتی گیان و ماڵی خودی هاووڵاتییان خۆیان، كەلوپەل و خۆڵ و خاشاك فڕێ نەدەنە ناو ئاوەڕۆكانەوە.
ئەم داواكارییەش لە دوای ئەوە دێت كە هەڵمەتکی دیكەی پاككردنەوەی ئاوەڕۆكان لە شاری هەولێر، بەسەرپەرشتیی بەڕێوەبەرایەتیی ئاوەڕۆكانی هەولێر و بە هاوكاری ڕێكخراوی GIZی ئەڵمانی بەمەبەستی خاوێنكردنەوەی تۆڕی ئاوەڕۆكان و چاڵی ئاو وەرگرتن و چاڵی پشكنین لە گەرەكەكانی: شەقامی كەركووك، شەقامی 60 مەتریی هەولێر، شارۆچكەی عەنكاوا، زانكۆ، گوڵان٢ بەڕێوەچوو، هەڵمەتەكەش بەردەوامی دەبێت.
شوان عهزیز
کۆمێنت (0)
تا ئێستا هیچ کۆمێنتێک نەکراوە.