کوردستان تیڤی بەدواداچوون بۆ ئەو کۆمەڵە پێشمەرگەیە دەکات گوایە لەناو بەفر و کڕێوە گیریانخواردووە

ژمارەیەک پێشمەرگەی سەر بە فەرماندەی هەڵگۆرد، بەهۆی بارینی بەفرێکی زۆر داوای بەهاناوەچوون دەکەن.

لە گرتە ڤیدیۆیەکدا پێشمەرگەیەک لەبەردەم دەرگای بارەگاکەیان لە سنووری حاجی ئۆمەران داوای بەهاناوەچوون دەکات، چونکە کارەبایان نییە و بەهۆی نزمبوونەوەی پلەکانی گەرما بۆ ژێر سفری سەدی و بارینی بەفرێکی زۆر ژیانیان لە مەترسیدایە و گیریان خواردووە.

بۆ بەدواداچوون لەسەر ئەم ڤیدیۆیە، کوردستان تیڤی پەیوەندی کرد بە موقەدەم شێروان شەریف، بەرپرسی فەوجی دووی سەر بە هێزی باڵەکی فەرماندەی هەڵگورد، ناوبراو ڕایگەیاند: ئەو کۆمەڵە پێشمەرگەیە لە ناوچەیەکی سنووری حاجی ئۆمەران لە ئەرکی خۆیاندان و ژمارەیان 14 پێشمەرگەن، ناوچەکەش بەهۆی ئەم شەپۆلە بەفرەی ناوچەکەی گرتۆتەوە، بەفرێکی زۆری لێباریوە.

سەبارەت بە گیرخواردنیان لەناو بەفر، ناوبراو ڕایگەیاند: نەخێر، ئەو پێشمەرگانە لەناو بەفر گیریان نەخواردووە، بەڵکو لە شوێنی خۆیاندان، دوێنێ ڕێگای رەبایەکەمان لەبەفر پاککردەوە، بەڵام بەهۆی شەپۆلی بەفری شەوی ڕابردوو ڕێگاکە ئاستەنگی بۆ دروست بۆتەوە.

ئەو فەرماندەیەی پێشمەرگە راشیگەیاند: ئێوارەی ئەمڕۆ قسەم لەگەڵ پێشمەرگەکان کرد، راستە کارەبایان نییە، بەڵام لەڕووی خۆراک و نەوت و سووتەمەنی کێشەیان نییە، بۆ ڕووناکیش فانۆسمان بۆ دابینکردوون.

سەبارەت بە هاناوەچوونی ئەو پێشمەرگانە، موقەدەم شێروان شەریف، گووتی: تا ئێستا لە هیچ شوێنێک ئاگادار نەکراوینەتەوە، هەر حاڵەتێکی فریاکەوتن، یان مەترسیان لەسەر ژیانیان هەبێت، بێگومان لە ئامادەباشیداین، بەڵام ئێمە وەک هێزی پێشمەرگە هەموو ساردی و گەرمی و ناخۆشییەک دەچێژین بۆ بەرقراربوونی ئەمنیەت و ئاساییشی کوردستان و پاراستنی خاکی کوردستان.

پ: کەریم سمکۆ