ژماره‌ی ئه‌و كه‌سانه‌ی كه له ویلایه‌تی واشنتۆنی ئه‌مریكا به‌هۆی ڤایرۆسی كۆرۆنای نوێ (كۆڤید-١٩)ه‌وه گیانیان له‌ده‌ستداوه بۆ نۆ كه‌س به‌رزبوویه‌وه.
دوای ئه‌وه‌ی كه دوو كه‌سی دیكه به‌هۆی تووشبوون به كۆڤید-١٩ گیانیان له‌ده‌ستدا، فه‌رمانگه‌ی ته‌ندروستیی ویلایه‌تی واشنتۆن، بڵاویكرده‌وه ژماره‌ی ئه‌و كه‌سانه‌ی گیانیان له‌ده‌ستداوه بۆ نۆ كه‌س به‌رزبووه‌ته‌وه و ژماره‌ی حاڵه‌ته‌كانی تووشبوون له ویلایه‌ته‌كه ٢٧ حاڵه‌تن.
دۆخی له‌ناكاو له ژماره‌یه‌ك ناوچه‌ی واشنتۆن راگه‌یه‌نراوه، له كاتێكدا كه ٢٣١ كه‌س له ژێر چاودێریی پزیشكییدان و له زۆرێك له قوتابخانه‌كان پشوو راگه‌یه‌نراوه.
دوای تۆماركردنی دوایین حاڵه‌ته‌كانی په‌یوه‌ست به كۆڤید-١٩ له واشنتۆن، له ئێستادا له سه‌رانسه‌ری ئه‌مریكا، ژماره‌ی ئه‌و كه‌سانه‌ی له ئه‌نجامی تووشبوون به كۆڤید-١٩ گیانیان له‌ده‌ستداوه، نۆ كه‌سن كه سه‌رجه‌میان له ویلایه‌تی واشنتۆنن و لانیكه‌م ١٠٨ حاڵه‌تی تووشبوونیش له ١٥ ویلایه‌ت تۆماركراون.
کۆمێنت (0)
تا ئێستا هیچ کۆمێنتێک نەکراوە.