ترەمپ: پشکنینی کۆرۆنام بۆ کراوه‌ چاوه‌ڕێی ئه‌نجامه‌که‌م

دۆناڵد ترەمپ سەرۆكی ئەمریكا رایگەیاند كە پشكنینی بۆ ڤایرۆسی كۆرۆنا كردووە و هێشتا ئەنجامەكەی دەرنەچووە.

دۆناڵد ترەمپ لە كۆنفرانسێكی رۆژنامەوانیدا، كە ئەمڕۆ 14-3-2020 لەگەڵ تیمی وڵاتەكەی بۆ بەرەنگاربوونەوی ڤایرۆسی كۆرۆنا ئەنجامیدا، رایگەیاند، رێوشوێنی پێویستمان بۆ بەرەنگاربوونەوەی ڤایرۆسەكە گرتووەتەبەرو خۆمان بۆ خراپترین سیناریۆ ئامادە دەكەین.

سەرۆكی ئەمریكا سەبارەت بەو هەواڵەی باسی ئەوە دەكات كە تووشی ڤایرۆسی كۆرۆنا بووە، گوتی: شەوی رابردوو پشكنینم بۆ كراوە، هێشتا ئەنجامەكە دەرنەچووە و چاوه‌رێم.

تاوەکو ئێستا لە ئەمریکا 50 کەس بەهۆی کۆرۆناوە مردوون و دوو هەزار و 340 کەسیش تووشبوون.

هاوكات سەرۆكی ئەمریكا كە باری لە ناكاوی بەهۆی ڤایرۆسی كۆرۆنا راگەیاند ئاشكرایكرد كە دەستدەكەن بە دابەشكردنی ملیۆنان دەمامك بەسەر هاووڵاتیاندا و چەندین رێكاری دیكەش دەگرنە بەر.