پارێزگاری هەولێر: داوا لە هاولاتیان دەکەم پەیرەوی رێنماییە تەندروستیەکان بکەن

فرسەت سۆفی، پارێزگاری هەولێر پەیامێكی بەبۆنەی هاتنی جەژنی نەورۆز بڵاوكردەوە و رایگەیاند" نەورۆز لە دڵمان لە هزرمان بە زیندویی دەهێڵینەوە.

فرسەت سۆفی، پارێزگاری هەولێر لە پەیامێكدا لە هەژماری تایبەتی خۆی نوسیویەتی" لە ناخی دڵمەوە پیرۆزبایی جەژنی نەورۆز لە گەلی کوردستان بە گشتی و خەڵکی شاری هەولێری خۆشەویست بە تایبەتی دەکەم. 

پارێزگاری هەولێر دەڵێت" نەورۆز بۆ ئێمە تەنها سەرەتای دەستپێکی بەهار نیە، نەورۆز بۆ گەلی کوردستان هێمای بەرخۆدان و خۆراگری و رەتکردنەوەی ستەم و زۆرداریە.

نوسیویشیەتی" ساڵەهای ساڵە لە نەورۆزدا کڵپەی ئاگر بە بەژنی چیاکانی کوردستان بڵێسە دەکات و میللەتێک بانگەوازی ئازادی و سەربەخۆیی لێدەدات. هەرچەندە لەو نەورۆزە بە هۆی ڤایرۆسی کۆرۆنا نەمان توانی نەورۆز بکەین و هەمومان بەیەکەوە بۆ پاراستنی مناڵ و کەسوکارو شارەکەمان لە ماڵەوە دانیشتوین، بەڵام نەورۆز لە دڵمان لە هزرمان بە زیندویی دەهێڵینەوە و یادی دەکەین."

ئاماژەی بەوەشكردوە" دڵنیام بە خۆڕاگری و پشتیوانی هاوڵاتیانی شارەکەمان ئەم دۆخەش تێدەپەڕێنین و بە سەلامەتی و سەرکەوتویی و سەربەرزی لێی دەردەچین. جارێکی دیکە داوا لە خەڵکی شارەکەم دەکەم لە ماڵەوە دابنیشین و پەیرەوی رێنماییە تەندروستیەکان بکەن تا بتوانین بۆ ئایندەیەکی پڕشنگدار خۆمان ئامادە بکەین"

لە كۆتاییدا رایگەیاندوە" دووپاتی دەکەینەوە ئێمە لە ئیدارەی پارێزگای پارێزگای هەولێر بە سەرجەم قایمقامیەت و بەرێوەبەرایەتی و فەرمانگەو هێزکانی ناوخۆو ئاسایش لە خزمەت ئێوە دەبین و شەو رۆژ دەخەینە سەریەک بۆ ئەوەی سەلامەتیتان بپارێزین، سوپاس بۆ ئیوەش کە هاوکارمانن.