د. سامان بەرزنجی، وەزیری تەندروستی هەرێم لە پەیامێكدا كە ئەمڕۆ بڵاویكردەوە رایگەیاند،"بەبۆنەی هاتنەوەی مانگی ڕەمەزانی پیرۆز گەرمترین پیرۆزبایی ئاراستەی هەمو موسوڵمانانی جیهان و عێراق و كوردستان بەگشتی و پزیشکان و کارمەندانی تەندروستی و فەرمانبەرانی دامودەزگا تەندروستیەکان بە تایبەتی دەكەین، لە خوای گەورە دەپاڕێینەوە هاتنی مانگی ڕەمەزانی پیرۆز مایەی ڕەحمەت و خێر و بەرەكەت و دورکەوتنەوەی نەخۆشی و ئازار و مەینەتیەکانی مرۆڤایەتی بێت و خوای گەورە ڕۆژو و نزای خێری هەموو لایەک قەبوڵ بکات."
وەزیری تەندروستی رایگەیاندوە،"لێرەوە جارێکی تر دەستخۆشی و ڕێز و سوپاسمان بۆ پزیشکان و کارمەندانی تەندروستی دەردەبڕین بەگشتی و بۆ مانەوە و شەونخونی و خزمەتکردنیان بەتایبەتی لە بەرەنگاربونەوەی ئەم پەتایەی کە جیهانی شێواندوە، داوا لە هاوڵاتیانی خۆشەویستیش دەکەین پابەندی ڕێنماییەکانی تەندروستی بن، هەروەها سوپاس و ستایشی ڕۆڵی مامۆستایان و زانایانی ئاینی خۆشەویست دەکەین بۆ هاوکاریان و ڕۆڵیان لە ئاڕاستەکردنی هاوڵاتیان بۆ ئامۆژگاریەکانی تەندروستی"
دەشڵێت،"هیوادارین بە پشتگیری و پاڵپشتی هەموو لایەکمان تەواوی هەرێمی کوردستان بپارێزین لە بڵاوبونەوە و تەشەنەکردنی نەخۆشی کۆڕۆنای نوێ COVID-19، دووبارە مانگی ڕەمەزان لە هەموان پیرۆز بێت و هەر ساغ و سەلامەت بن."
کۆمێنت (0)
تا ئێستا هیچ کۆمێنتێک نەکراوە.