قایمقامی چۆمان و ڕەواندز دەست بەکاربوون

لەچوارچێوەی گۆڕانكارییە ئیداریەكانی كابینەی نۆیەمی حكوومەتی هەرێمی كوردستان لە سنووری پارێزگای هەولێر ئاڵوگۆڕی لە چەند پۆستێكی ئیداری ئەنجامدرا.

بەمەبەستی زیاتر خزمەتکردنی هاوڵاتییانی سنووری پارێزگای هەولێر و لەچوارچێوەی گۆڕانکارییەکان، سەرلەبەیانی ئەمڕۆ 2020.6.17 بە سەرپەرشتی هێمن قادر، جێگری پارێزگاری هەولێر، دەستکرا بە ئاڵۆگۆڕ و جێگۆڕکێی هەر یەک لە قایمقامی قەزاکانی (چۆمان و ڕەواندز).

بە ئامادەبوونی بەپرسانی ئیداری و فەرمانگاکانی قەزاکان، بە سەرپەرشتی جێگری پارێزگاری هەولێر، ڕێوڕەسمی ئاڵوگۆڕ و دەستاو دەستکردنی پۆستی قایمقامەکانی قەزاکانی چۆمان و ڕەواندوز سازکرا و سوارە ئەکرەم، قایمقامی قەزای خەبات بەوەکالەت وەک قایمقامی چۆمان دەست بەکار بوو و ئەحمەد قادر قایمقامی قەزایی چۆمان لە جێگەی کوێستان ئەحمەد وەک قایمقامی قەزای ڕەواندز دەست بەکاربوو.

لەوبارەیەوە هێمن قادر جێگری پارێزگاری هەولێر، وێرای سوپاس و ستایشی بۆ ئەرک و ماندووبوونی هەر یەک لە قایمقامەکانی قەزاکانی (چۆمان و ڕەواندز) ڕایگەیاند: "سەرجەم قایمقام و بەڕێوەبەری ناحییەکانی سنووری پارێزگای هەولێر، بۆ پارێزگا و ئێمە سەروەتێکی گەورن و جێگەی شانازین، هەر یەکێک لەو بەڕێزانە لەڕووی یاسایی و کۆمەلایەتیەوە شارازان و خاوەنی ئەزموون و توانای زۆرن لە کارەکانییان، ئەو گۆڕانکاری و جێگۆڕکێیەش بۆ بەرژەوەندی گشتییە و مەبەست لێی گواستنەوەی تواناو لێهاتووی ئەوانە بۆ خزمەتکردنی زیاتری هاوڵاتییانی سنووری قەزاکان".

جێگری پارێزگاری هەولێر وتیشی: "بەردەوامین لە گۆڕانکاریەکان و دڵنیاین بەو گواستنەوە و جێگۆڕکێیە، دەتوانین خزمەتی زیاتری هاوڵاتییانی سنووری قەزاکانمان بکەین، بۆیە بەناوی بەرێز د.فرسەت سۆفی، پارێزگاری هەولێر و بەناوی خۆمەوە، دەست خۆشی و سوپاسی سەرجەم فەرمانگە و بەڕێوەبەرایەتیەکانی سنووری قەزاکان دەکەین، پیرۆزباییش لە قایمقام و بەڕێوەبەری ناحییەکان دەکەین و هیوای سەرکەوتنیان بۆ دەخوازین، بڕوامان وایە هەر یەکێک لەو بەڕێزانە بەو توانا و لێهاتوویی و ئەزموون و شارەزاییەی هەیانە، دەتوانن خزمەتی زۆر هاوڵاتییانی سنوورەکانییان بکەن".

ڕاگەیاندنی پارێزگای هەولێر
2020.6.17