سه‌رله‌به‌یانی دوێنێ 2/7/2020 شاندێکی باڵای وەزارەتی پێشمەرگەی هەرێمی کوردستان گەیشتە بەغدا و لەگەڵ بەرپرسانی باڵای وەزارەتی بەرگریی عێراق كۆبوونه‌وه، راگه‌یاندنی وه‌زاره‌تی پێشمه‌رگه راگه‌یه‌ندراوێكی بڵاوكرده‌وه.
شاندێكی باڵای وەزارەتی پێشمەرگە لەسەر داوای لایەنی عێراقی سەردانی بەغدایان کرد، شانده‌كه پێکهاتبوون له هه‌ریه‌ك له به‌ڕێزان فەریق جەمال محه‌مه‌د ئێمنکی، سه‌رۆكی ئه‌ركان و، فەریق جەبار یاوەر ئەمینداری گشتی وەزارەتی پێشمەرگە و ژمارەیەک له ئەفسەرانی باڵای وه‌زاره‌ت.
دوای گه‌یشتنیان بۆ به‌غدا، شاندی وه‌زاره‌تی پێشمه‌رگه له‌گه‌ڵ شاندی وه‌زاره‌تی به‌رگری عێراق بە سەرۆکایەتی عەبدولئەمیر شەممەری، جێگری فەرماندەی ئۆپەراسیۆنە هاوبەشەکان کۆبوونەوە.
له كۆبوونه‌وه‌كه‌دا، گفتوگۆ کرا لەبارەی کاراکردنه‌وه‌ی لیژنه‌ی كاری هاوبەش و ناوه‌نده‌كانی هه‌ماهەنگی هاوبه‌ش كه پێشتر له نێوان هەردوولادا هه‌بوون. هەروەها باس له چۆنیەتی ئەنجامدانی ئۆپەراسیۆنی هاوبەش له ناوچه جێناكۆكه‌كان كرا به‌تایبه‌ت كه ئێستا مه‌ترسیه‌كانی تیرۆریستانی داعش زیایكردووه‌و هه‌ڕه‌شه‌ی به‌رده‌وامن له‌سه‌ر ئاسایشی ناوچەكانی مادده‌ی 140.
هه‌رله‌و كۆبوونه‌وه‌یه‌دا، هه‌ردوولا هاوڕابوون له‌سه‌ر به‌رده‌وامبوونی دیدارو کۆبوونەوەکان و وا بڕیاریشه له کۆتایی ئەم مانگە شاندێکی وەزارەتی بەرگریی عێراق سەردانی وه‌زاره‌تی پێشمه‌رگه بکات.
کۆمێنت (0)
تا ئێستا هیچ کۆمێنتێک نەکراوە.